تحتفل الكنيسة القبطية اليوم بتذكار القديس تكلا هيمانوت، وتحدث القس جوناثان رفعت، كاهن كنيسة السيدة العذراء والقديس تكلا هيمانوت بالعبور، واصفًا مدى روعة صداقة هذا القديس الذى يخدم بيعته.
وكتب”يمكن اول مره في حياتي اتعمق كده مع القديس الانبا تكلا هيمانوت الحبشي
لأن كنيستنا بأسم العذراء والأنبا تكلا هيمانوت
اول مره اشعر بفرحه ليلة عيد نياحته وأهمية عيده وازاي عيده كان فرحه كبيره وسط الشعب
اول مره استمتع النهارده بقداس عيد القديس العظيم ده
اول مره احس ان اذاي القديس ده ما تصاحبتش عليه من زمان
بالمناسبة دي عاوز أتأمل معاكم في صورة القديس الانبا تكلا
صورة ٦ جناحات
قصص كتير بتتقال عن ال٦ جناحات
لكن انا عايز أتأمل معاكم في حياته من خلال ٦ جناحات
+ الجناح الاول
تشبه بالملائكة في تسبيحه
الأنبا تكلا كان رجل تسبيح حتى اسمه معناه (فرح صهيون او فرح الكنيسة) فكان رجل مسبح
فهو تشبه بتسبيح الملائكة
+ الجناح الثاني
تشبه بالأنبياء في صدق أقواله
كان كلامه ثابت كانت أقواله جناح بيطير بيه ضد العالم
+ الجناح الثالث
تشبه بالرسل في كرازته كان بيروح من مكان لمكان ومن قريه لقريه كان يكرز ببشاره الملكوت
+الجناح الرابع
تشبه بالشهداء في احتمال كل العذابات وجهاده المستمر
+ الجناح الخامس
جناح الرهبنة والنسك والعبادة وحياة الصلاة
+ الجناح السادس
جناح الكهنوت اللي بيخدم بيه وسط عالم صعب
٦ جناحات كانوا هنا قوه حياته
تسبيح
النبوة
الرسولية
الشهاده
الرهبنة
الكهنوت
الأنبا تكلا هيمانوت قديس عظيم.
